Um höfundinn

Ég ólst upp á Vestfjörðum en fluttist til Reykjavíkur 16 ára að aldri til náms. Á fullorðinsárum hef ég bæði búið erlendis og starfað á ólíkum vettvangi; stundað nám í Barcelona, verið au-pair í Finnlandi, lokið þremur háskólagráðum – þar af einni erlendis – og starfað bæði á auglýsingastofu og í markaðsdeild alþjóðlegs fyrirtækis. Í dag starfa ég sem verkefnastjóri hjá Landssamtökunum Geðhjálp en hluti af minni vinnu þar fólst tímabundið í að sinna verkefnastjórn hjá Bataskóla Íslands.

​

Samhliða námi og starfsferli hef ég glímt við verulega vanlíðan og kvíða. Ég ólst upp við erfiðar aðstæður heima fyrir og var lögð í einelti í grunnskóla. Þrátt fyrir að „standa mig vel“ út á við upplifði ég lengi skort á öryggi, sjálfstrausti og tengslum við sjálfa mig.

 

Um tvítugt hóf ég markvissa sjálfsvinnu með það að markmiði að líða betur í eigin skinni og skilja sjálfa mig betur. Ég fann fljótt að lausnirnar sem ég leitaði að voru ekki eingöngu að finna í hefðbundnu heilbrigðiskerfi, sem leiddi mig til að kanna ólíkar leiðir til sjálfsskoðunar, samtalsmeðferðar og innri vinnu. Í gegnum árin hef ég sótt fjölbreytt nám og handleiðslu, bæði á sviði samskipta, sjálfsþekkingar, núvitundar og persónulegs þroska.

 

Í þeirri vegferð hef ég lært mikið um:

• hvernig áföll og langvarandi streita hafa áhrif á fólk

• hvernig taugakerfið mótar viðbrögð, samskipti og ákvarðanir

• hvernig misskilningur, óöryggi og varnarviðbrögð birtast í daglegu lífi

• og hversu mikilvægt það er að byggja upp innra öryggi áður en raunverulegar breytingar eiga sér stað

 

Það sem ég miðla í fyrirlestrum, námskeiðum og skrifum byggir á blöndu af fræðilegri þekkingu, starfsreynslu og eigin reynslu. Ég legg áherslu á skýrt, jarðbundið mál, án dramatíkur eða einfaldra lausna. Markmið mitt er ekki að segja fólki hvað það eigi að gera, heldur að styðja það í að skilja sjálft sig betur og taka ábyrgð á eigin lífi á raunhæfan og mannúðlegan hátt.

 

Ég trúi því að raunverulegur þroski snúist ekki um að verða „eitthvað annað“, heldur um að verða heill – að vera heima í sjálfum sér.